माैन संवाद

कविता
माैन संवाद
प्रिय शून्यता !
नमन !
तिमीले मेरो मानसपटलको ठेगानामा पठाएको पत्र प्राप्त भयो 
यताको हालखबर सोधेकी रहिछौ 
खबर के भनौं र जसोतसो चलेकै छ 
सागरमा पौडिने माछालाई अङ्खोरामा बाँच्ने तालिम दिइँदो रै’छ; सिक्दैछु
मुटुलाई ढुङ्गा बनाउन पनि सिकेको छु
मान्छेलाई वस्तुको आँखाले हेर्न पनि सिकेको छु
यस्तै यस्तै अनेक सिकाएको छ मलाई यो शहरले
यदि भेटहुँदा तिमीलाई मैले चिनिन भने सम्झनु आज यसको गोजी रित्तै छ
मान्छे रोइरहेको देख्दा वास्तै नगरी हिँडेको पायौ भने मलाई
त्यहाँ पनि अन्यथा नलिनु
आखिर मैले यो शहरबाट यही पाठ सिकेको छु
जहाँ एकाबिहानै भाले बास्दैन, काग कराउँछन् ।
© मुक्ति भण्डारी